العودة   مجتمع ريلاكس | للحياة نكهتنا الخاصه َ > ¬ | رَيلآكسَ الأسريه والاجتماعيه ✿ ، > اطفال - ازياء اطفال - صور اطفال




المواضيع الجديدة في اطفال - ازياء اطفال - صور اطفال


إضافة رد
 
LinkBack أدوات الموضوع انواع عرض الموضوع
  #1 (permalink)  
قديم 09-16-2012
الصورة الرمزية ميرال
ميرال
عُضوٌ بقَرآطُيسٌهَ
 الأوسمة و الجوائز
 آخر مواضيعي
 بينات الاتصال بالعضو
 رقم العضوية : 3474
 تاريخ التسجيل : Sep 2012
 المشاركات : المشاركات 2,237 [ + ]

ميرال غير متواجد حالياً
افتراضي نصائح في تربية الاطفال


السلام عليكم ورحمة الله وبركاته

كيفكم ياامهات ؟؟ وكيفهم الحلوين ؟؟

وانا اتصفح في النت عجبتني هذي النصائح في التربيه..
ممكن يكون اغلبها عارفينها وحافظينها ..

وللتذكير فيها نقلتها لكم يالغوالي ..
(( الله يعطي صاحبة الموضوع العافيه ويجزاها كل الخير ))
- اهم مرحله بعمر الطفل من مولده الى 7 او 8 سنوات تقريبا , يعني انتبهي لنفسيته وراعيها اكثر بهالعمر, لان أي شي ممكن يأثر فيه بهالفتره ويبقى اثره عليه لاخر العمر .
- اغمريه بمشاعر الحب والحنان , واعطيه كفايته من هالشي , علشان بعدين لما يكبر مايدور هالشي
بطريقه خطأ
وعلميه يقول الكلام الحلو , وعلميه كيف يعرف يعبر عنه بطريقه حلوه , تصدقون مره اختي اللي بالابتدائي اعطتها صديقتها هديه , وردت عليها اختي
بابتسامه , وبكل عفويه قالت ياعمري انتي والله احبك
قالت لها صديقتها عيب تقولين كذا هذا كلام المتزوجين وبس !!! وصدقوني اللي تتربى محرومه من الكلام الحلو راح يكون صعب عليها تقوله بعدين حتى مع زوجها .
- ازرعي بداخله بهالعمر حب الله وحب الرسول محمد صلى الله عليه وسلم , وحببيه باداب الاسلام وعلميه الاساسيات
بالدين , ومااعني بكلامي تسولفين للطفل عن الجهاد !
ولاتكرهينه بالكفار ولا مثل هالمواضيع لأ !!
واللي قصدته عوديه مثلا انو لما يبدأ بشي لازم يسمي , ولما يغلط يقول استغفر الله , ولما يحصل على نعمه
يحمد الله عليها , وذكريه كل فتره وقولي له انت تشوف وتسمع وتمشي وتحرك اطرافك , واعضائك كامله ومافيها مشاكل , وتقدر تحكي , وعندك
اهل وبيت , وعندك لبس واكل وشرب بكل وقت , وودك هالنعم ماتروح منك ابد صح ؟
خلاص احمد ربي عليها بكل وقت وانتبه يمر يوم بدون ماتقول الحمد لله على كل نعمه .
-كلمي الطفل بكلام سليم ومفهوم , علشان يكون نطقه للكلمات سليم ومفهوم ولا تكلمينه بنفس نطقه هو للكلمات .
- احرصي على تحصين الطفل , علشان ترتاحين ان طفلك ان شاء الله مايضره شي وانتي مستودعته الرحمن , يعني ماراح تخسرين شي اذا عودتي هالطفل ينام على
سورة البقره , كلها دقايق حمليها من النت وشغليها بالغرفه عنده قبل ينام , واول مايصحى من النوم حصنيه واستودعيه الرحمن , وانا يابنات لما قلت تحصين
مااقصد الوسوسه بهالشي , لان بعضهم لو تقولين لها الله بنتك طالعه اليوم قمر , وقبل تنطقين ماشاء الله تنشب بحلقك قولي ماشاء الله , ولو تطيح بنتها
بالصدفه , قالت بسم الله على بنتي صابتها عين !
واللي قصدته انو الانسان يحافظ عالتحصين ويتوكل على الرحمن
- أي شي تعلمينه الطفل طبقيه عملي قدامه مو تنصحينه بشي انتي ماتطبقينه ! او تمنعينه من شي لانو غلط وانتي تسوينه !
لان مهما كان راح يستوعب انك تكذبين , ووقتها لك تتخيلين كيف نظرته لك !
و بعد كذا ماراح يثق فيك ولا يصدقك بأي نصيحه توجهينها له ولا راح يطبقها .
- ابعدي عن الدلال الزايد للطفل , لان هالشي راح يخليه مايعتمد على نفسه ابد , والمطلوب علميه وراقبيه من بعيد , بس اتركيه يعتمد على نفسه , لان بعضهم
مايعرفون يدافعون عن انفسهم حتى لو بالكلام , عندي صديقه من اول شهر زواج راحت لاهلها تبي تتطلق ليه ؟؟؟
تقول جرحني يقول انتي بياضك ماصخ !!!
صحيح هالشي ماله دخل بموضوعنا بشكل مباشر , بس شفتوا بناتكم واولادكم اللي تدللونهم بزياده, بيصيرون كذا اذا كبروا ع أتفه شي ينجرحون
و مايعرفون يدافعون عن انفسهم , ويمكن يجيهم اكتئاب بعد !
اتركوهم يعيشون الحياه , ويعرفون ان هالحياة فيها ناس خلوقه وناس لا , وفيها ناس امينه وناس خاينه , وفيها ناس كذابه وناس صادقه , خلوهم يحسون
بكل انواع الاحساس , سواء الحب او الشوق اوالغيره اوالغدر اوالخيانه أو الجرح , والمطلوب كونوا جنبهم وقت احتياجهم لوقفتكم
واغمروهم بحنانكم وساعدوهم يتغلبون على هالمواقف اللي يشوفونها , علشان يصيرون اقوى منها ويتعلمون منها
- ابعدي عن اسلوب الاطراء المبالغ فيه , يعني مو كل الوقت يافلان انت ذكي ولا اذكى واحد ! لان بعدين هالطفل لو يغلط اقل غلط راح يقول
عن نفسه انو غبي , وبيحس ان الغباء منه شي مو طبيعي وجريمه , وبتتعب نفسيته , لانو ماتعود على هالشي !
كوني واعيه بمدحك له يعني اذا صدر منه تصرف يستحق المدح امدحيه , واذا لا , لا تمدحينه
خليه يحس انو انسان طبيعي , اذا سوى شي يستاهل المدح راح يسمع اطراء , واذا ماسوى ماراح احد يثني عليه , ووقتها هالشي بيحمسه انو يبدع علشان يسمع المدح منك .
- ابعدي عن اسلوب النقد القآسي , لان هالاسلوب ممكن ينفع مع بعض الاجانب , ويطلع منهم اشياء حلوه , يعني الواحد اذا فشلتيه
وقللتي قيمة شي انجزه , يحطك في باله , وراح يكون كل الوقت يتحدى صورتك علشان يثبت لك العكس , وانو راح ينجح , لكن طبقي هالشي على عربي
والله بتاخذين ذنوبه , لان حتى لو كان طفل مبدع
من كلامك له راح يتحطم ويكره هالشي بسببك , و اذا شخصيته قويه يمكن مايتحطم منك , لكن ماراح يظهر لك ابداعاته , ولا راح يهتم لرأيك لانك صرتي بنظره انسانه
ماتستحق تشوف ابداعه , ولا تستحق منه انو يسمع رأيها , واكيد السبب ورى هالشي هو الكرامه , علشان كذا انتبهي تقللين من قيمة شي انجزه الطفل
وكوني ذكيه واستخدمي معه اسلوب النقد البناء , يعني امدحيه واثني عليه وبعد كذا انتقدي
بلطف ولين ولباقه , وفيه بعضهم صحيح يستخدم هالاسلوب الحلو بالنقد , لكن تلاقينهم بعد المدح يقولون كلمة لكن او كلمة لو او كلمة بس وبعدهم النقد
وهالكلمات بمدحك تطلعك كأنك تسبينه ماتمدحين , بتقولون كيف ؟ انا اقولكم بهالمثال
طفل يفهم يعني فوق ال 7 سنوات اعطاك رسمته , وقال ابي رايك فيها, ولنفرض بتقولين للطفل حلوه رسمتك (لكن , بس) (لو) حاط الورود
بالوان كثيره كان طلعت الرسمه احلى !
الان شوفي الجمله غيرتها وحذفت كلمة لكن ولو وبس
حلوه رسمتك وبالذات الورود مره اعجبتني يا فلان ابدعت فيها , وبعد تخيلت هالورده حمراء وهالورده صفراء
وهالورد بنفسجيه , احسها بتطلع احلى واحلى صح ؟
صح انها طلعت سالفه مو رأي وبس , لكن هالشي بصالح الطفل , وماراح تخسرين شي , لو صار ردك له سالفه ماتاخذ منك اكثر من دقيقتين .
- فيه طريقة ثانيه بعد ماتنفع خصوصا اذا كان الطفل من النوع العصبي , وانا اشوفها بعد ماتناسب اطفال العرب نهائيا , وهي حبس الطفل الفوضوي بغرفة العقاب
لمده معينه أو في ركن
العقاب , هالطريقه مافيه امل تنجح , لان تخيلي واحد معصب ومسوي هوشه مع اخوه مثلا , وتجين انتي بكل برود تعاقبينه وتحبسينه بغرفه , وش ظنك بيصير فيه ؟!
متوقعه منه يهدأ ولما تجينه بيجيك يبوسك ويقول سوري ياماما انا غلطت !
انا بجاوبك احلمي يصير هالشي , وان صار فمعناه خوف منك او هروب من العقاب
مو اكثر , يعني ماراح يقتنع بخطأه وغير كذا شوفي وش كثر راح يكون ضرر هالشي ع نفسيته , يعني شخص معصب , ويجيه احد يرفع ضغطه زياده
ويحبسه , لا وبعد يطالبه بحبة راس واعتذار !
انا الاحظ امي اذا اختي العصبيه صلحت فوضى , تاخذها لغرفتها وتقفل الباب , وتجلس تقول لها انا احبك
وهالشي اللي سويتيه خطأ, لانو كذا وكذا و كذا ولو تكرر راح ازعل منك
وراح يكون فيه عقاب وووو الخ , وشوي تطلع أختي وتعتذر من اللي متهاوشه معه , وتروح تكمل لعب وهي عارفه وش خطأها ومقتنعه فعلا انها غلطت , واحيانا تعاند شوي وماتروح مع امي
اذا قالت لها تعالي معي نحكي بالغرفه , وتضطر امي تاخذها بالغصب , يعني اهم شي
تجلسين مع الطفل لو بالغصب , وتفهمينه انو غلطان وتقنعينه بخطأه .

- لاتحاسبينه ع تقصيره واخطائه بحجة انك لما كنتي بعمره كنتي الطفله الملاك والمثاليه اللي ماتغلط ابد !
وكوني صادقه مع الطفل , يعني مهما كان كل انسان طبيعي لازم يغلط ويتعلم من غلطه , وتأكدي مهما حاولتي تلمعين الصوره
مرده بيعرف انو امه او اخته مو ملاك , وانو لما كانت طفله
كانت تغلط وتتعلم من غلطها ! واللي قصدته انو لا تجلسين تقولين له كل ماغلط انا بعمرك ماسويت
ولا حطيت , لان لو جلس مع جده ولا جدته ولا عمه ولا خاله وسألهم , علموه انك
غير عن اللي تقولين له !!
- فهمي الطفل بأنو لازم يتصرف بكل مواقفه مع الناس بدون تفرقه , وقولي له
عيب نعامل كل شخص ع حسب ***ه او لونه او اصله
( قولي له لازم تكلم اللي اكبر منك بأدب سواء سعودي ولا اجنبي عامل نظافه , ومافيه شي اسمه انا
سعودي ومو مثله , ومافيه شي انا عندي وغيري اقل مني وماعنده , علميه ان الله
خلقنا بصفات مختلفه فيه مننا الابيض والاسمر , وفيه مننا الحلو واللي اقل جمال , وفيه
مننا الغني والاقل ماديه , ومافيه فرق بيننا ابد , وانو اللي ينظر لهالفروق شخص جاهل , وانت لازم
تتصرف مع الكل بنفس اخلاقك اللي تربيت عليها , وماتحتقر
أي انسان , لان الله خلقنا كلنا من تراب ومصيرنا كلنا واحد )
- عوديه ع شكر الناس يعني كل مااعطاك شي او خدمك بشي ابتسمي له , وقولي له
شكرا حبيبي , واذا انتي خدمتيه بشي قولي له قل لي شكرا ولا مااعجبك الشي اللي سويته لك ؟
واذا قال شكرا قولي عفواحبيبي , ومع
الوقت راح يعرف ويتعود عالشكر , وراح يتعلم انو كلمة شكرا تقابلها بالرد عفوا
شغالتنا اول كلمه عربيه حفظتها شكرا , من اخواني الصغار , لان كل ماخدمتهم بشي ابتسموا لها وقالوا شكرا , وجت مره تسألني بالانجليزي عن معناها , وقلت معناها
الشكر , واستانست وحفظتها وصارت دايما ع لسانها > طبعا الشغاله عندنا ماتخدم الاطفال بنفسها نهائيا , لكن هالشي كان اول ماجتنا , لانها كانت جديده ومن تشوف طفل يطلب شي
مننا , تروح ع طول تجيبه , بس الان علمتها امي ان مالها أي علاقه بالاطفال .
وبقولكم موقف صار لي مع اصغر اخواني وقبل شهرين
جاء عندي بعد موقف صار له مع اختي وقال كل شوي شكرا , خلاص طفشت ماراح اقولها ابد , المهم انا قلت هذا طفل الحين كيف بفهمه
اخر شي قلت له اذا انت عطيتني هديه وماقلت شكرا بتزعل مني ؟ قال ايه , قلت طيب بتجيب لي هديه غيرها ؟ قال ايه عادي , قلت طيب واذا بعد ماقلت شكرا وش تسوي ؟
قال لا والله خلاص مااجيب لك ابد , وجلست اضحك قلت شفت اللي مايقول شكرا وش يصير له ,
الناس كلهم بيسوون مثلك ويقولون خلاص اللي مايقول لنا شكرا ما نسوي له شي
وبهالطريقه حس انو بدون الشكر النعمه ماتدوم , ولا عطاء الناس له راح يستمر , يعني اغرسي بداخله هالاشياء بهالطريقه , وخليه يقتنع علشان يؤمن بأثر هالاشياء عليه .
- بالنسبه للخدم عندنا بالبيت ممنوع الشغاله تخدم الطفل او الرجال بنفسها, لاحظوا ماقلت انا اغسل واكوي ملابسهم وهي ديكور بالبيت ! انا قلت ماتخدمهم بنفسها .
وبقولكم موقف صار معي قبل اسبوعين كنت بمكان عام وشفت بنتين جمال وجاذبيه ماشاء الله
وكانوا يركضون ومامعهم احد , قلت لهم وين ماما ؟ قالت وحده منهم ماما تركت عندنا الشغاله بس
راحت وتركتنا , المهم انا ماقدرت اتركهم وجلست معهم عالكراسي
وحده تعرف تتكلم بس الثانيه مره صغيره ماافهم وش تقول , وربي جلست 10 دقايق لا الشغاله جت ولا امهم , وشوي
الا البنت صرخت ماما جت وراحت لها وامهم خافت قالت وش فيه ؟
قلت لقيتهم لوحدهم والمكان مزحوم ومسكتهم لانو خفت عليهم , وشوي جت شغالتها
شاريه اكل للصغار , وجلست تهاوشها وانا مشيت وهي تهاوشها
بس بداخلي نقدت عليها , مدري كيف مااستحت ع وجهها تحاسب الاجنبيه على اهمالها للاطفال , وهي امهم
ومسئوله عنهم ماكلفت ع نفسها تنتبه عليهم وتاركتهم بمكان عام مع الشغاله بدون رقيب كأنها خالة البنات ولا عمتهم!!
ومره كنت بالسوق ودخلت انا واختي دورات المياه وانتم بكرامه , وجلسنا نعدل الغطاء عند المرايا , وشوي فتح باب حمام الله يكرمكم وطلعت شغاله معها بنت صغيره تقريبا
3 سنوات , انا واختي جلسنا نطالع في بعض مصدومات , يعني وصل فيهم العجز انهم مايقدرون يدخلون صغارهم الحمام الله يكرمكم !!
وربي اختي من الصدمه , لحقتهم لما راحوا برى دورات المياه , تقول عندي امل تكون الام واقفه برى تنتظر , او عالاقل بمحل قريب من هنا
ظنكم ثقتها بالشغاله اكبر من انو تتخيل انها ممكن تاخذ البنت وتهرب لانها بمكان ثاني بالسوق بعيد عن عيونها !!
- عودي الطفل على التخطيط لكل شي سواء ليومه او للسنه او لمصروفه , وحكيت عن طريقة التخطيط بشكل السلم بموضوعي كيف تحقق أهدافك (هنا)
لانو لما يتعود مثلا عالتخطيط اليومي راح يحس بقيمة الوقت , مثل اخواني كل واحد كاتب بورقه اهم 5 او 6 اشياء في يومه و على حسب اهتماماته مثلا : وقت لقراءة القران
والاستغفار , وقت للرياضه , وقت لافلام الكرتون , وقت للمذاكره , وقت للنظافه
يعني اشياء لازم يسوونها بهاليوم ويخصصون لها وقت ومايمر اليوم بدونها , لان الانسان
اذا كانت حياته بدون تخطيط لهدف راح يصير ضايع ويبي يسوي كذا وكذا بس بالاخير
مايسوي شي ليه ؟ لانو ماجرب يخطط لشي معين ويعطيه وقته علشان يحققه
يعني قولي للطفل اذا فيه شي مهم بحياتك وودك تنجزه بسرعه بدون تسويف حدد وقت معين وقل لازم اسوي هالشي قبل هالوقت .
وقبل حكيت بموضوع عن التخطيط للمصروف وهالشي مهم حتى للطفل , يعني لا تاخذين مصروفه وانتي اللي تشترين له كل شي وهو مايدري عن شي , والمفروض من يدرس
ع طول تتعودين انو تسلمينه المصروف بيده بس اكيد تحت اشرافك لان باقي صغير بس غايتنا يستوعب الشي اللي نبيه يتعلمه , وتعطينه حصاله يحفظ فيها مصروفه
لوقت الحاجه , وتاخذين ورقه وقلم وتوزعينه قدامه , خليه يشوف بعينه ويتعلم منك التخطيط
من هالعمر
ولو قدرتي حاولي تكون الفلوس فيها كل الفئات ( ريال, خمسه, عشره, خمسين, ميه ) وبكذا يعرف يتعامل مع الفلوس ويحسب صح
وطبعا توزيعك للمصروف راح يكون بمثل هالطريقه وانتي غيري على حسب الاحتياجات :
مبلغ للصدقه + مبلغ للتوفير + كتب او العاب تعليميه + الباقي لاحتياجاته الباقيه من لبس وغيره
بالنسبه للصدقه يُفضل يكون فيه حصاله عند الام او الاب للصدقات , يعني كل شخص بالبيت ياخذ
الجزء اللي مخصصه للصدقه من مصروفه ويحطه بالحصاله , وبالاخير تاخذون المبلغ وتتصدقون فيه .
- احميه من الحقد وعلميه التسامح : اجلسي مع الطفل وعلميه انو الواحد اذا كان متضايق من احد
مفروض ماينام الا بعد مايروح الزعل , وانو الواحد اذا نام وهو زعلان من احد , راح تصير بقلبه نقطه
سوداء اسمها حقد , وماراح يقدر يحس بالراحه كل عمره اذا ماتخلص منها ع طول , لانها كل يوم راح تكبر اكثر و اكثر
(بالنسبه لاخواني انا كل يوم او يومين اجلس معهم واسمع منهم , واذا ماكنت فاضيه اقول لأمي تجلس
معهم او اخوي , اهم شي احد يسمع لهم , يعني هي كم دقيقه ومو خساره لو قضيتيها بشي لصالح
هالطفل , المهم وقتها نسألهم فيه احد ضايقكم اليوم , مين هالشخص وليه ومتى صار هالحكي ؟
اهم شي ماينامون بهاليوم الا بعد مايفضفضون اللي بخاطرهم , واللي يصير انو يجلس كل واحد يحكي عن
اللي مضايقه لما يرتاح من القهر اللي يحسه , واحيانا اسمع اشياء تضحك بس مهما كان مااحقرها ابد لانهم اطفال وكل شي يأثر عليهم
يعني مره قالت لي اختي الصغيره انا مقهوره من امي تخيلي اليوم تقول لابوي الدلع كله لاخر العنقود ,
تقصد اخوي الصغير , وتحسبنا نشوف افلام الكرتون ومانسمعها , يعني وش معنى كلامها هو ولدها
واحنا عيال الجيران , وربي يابنات تحكي من قلبها ودمعتها بعينها , انا وقتها ماسكه نفسي مابي اضحك
قدامها , بس لازم اتفهم انها طفله , وهالشي بنظرها جريمه من امي , المهم وقتها كلمت امي وجلست
تضحك تقول ع بالي مو منتبهين لكلامنا , وجلست معهم وفهمتهم انهم كلهم سواء عندها ,طبعا بتقولون
سالفه ماتسوى , بس الاطفال كل شي يأثر فيهم , يعني لو ماطلعت اللي بقلبها كان جلست تعتبر اقل
اهتمام نعطيه اخوي الصغير تفرقه بينهم , وبتجلس تحس بانها اقل منه اهميه عندنا , ويتراكم بداخلها
هالشعور لما تغار منه وتكرهه .
واذا كان الطفل يستوعب علميه انو اذا ماتقدر تواجه الشخص اللي مضايقك وجها لوجه , مفروض تعبر
عن هالشي برساله او اذا شايف ان هالشخص ماراح يستوعب خطأه وراح تكبر السالفه , امسك ورقه
وقلم وعبر فيها عن كل شعور تحسه بداخلك , ولما تخلص كتابه وترتاح قطع الورقه وارميها وبعدها نام
مرتاح , اهم شي تتخلص من هالشعور اول باول ولا تتركه ابد يتراكم بداخلك ويبقى اثره .
- اعطي هالطفل الحريه بالكلام واحميه من التصنع واحميه من اضطرابات النطق وعدم الثقه
بتقولون كيف ؟
الطفل لما تقاطعينه بالحكي راح يكون كلامه مضطرب ومتقطع , ولما تجلسين تعلقين ع كل كلمه من
هالطفل وتضحكين على اسلوبه او نطقه او حركات يده وهو يحكي , راح يصير يتجنب الحكي مع الناس , او يتصنع
ويحاول يرضي اللي قدامه سواء بكلامه او اسلوبه او حركاته , خليه يتعود
يقول اللي بخاطره ويحكي مثل مايبي وبكل عفويه , مااعني بكلامي تتركين له المجال يقول حتى
الكلام الغير لائق , لكن عوديه يكون عفوي بكلامه وتصرفاته .
- عودي الطفل عالجماعه واحميه من الوحده , يعني اذا كان وحيدكم وماعنده اخوان ومافيه غيرك انتي وابوه , حاولوا تكونون دايما معه
وخصصوا جزء من وقتكم له , طلعوه لمكان فيه العاب واطفال يختلط معهم بوجودكم , زوروا اقاربكم
واتركوه يختلط مع اطفالهم بوجودكم , لان هالشي راح يخليه اجتماعي , ويتعلم
اشياء كثيره صعب يتعلمها لو انو كان كل الوقت جالس لوحده , وبكذا راح تحمونه من الخجل ,
والخوف من الجلوس مع مجموعه من الناس .
- نبهي الطفل للفرق بين الحسد و الغبطه , فهميه انو الحسد صفه مو حلوه ومفروض يحمي نفسها منها بالمحبه وحب الخير للكل .
- فهميه انو اي شي ماترضاه على نفسك لا ترضاه عالناس , وقبل تحكم على اي ردت فعل من شخص
حط نفسك مكانه وتخيل وش كانت راح تكون ردة فعلك وقتها .
- عوديه عالصبر وفهميه انو الانسان لما يبتلى فهالشي اختبار من ربي له , وانو عند ربي العوض,
علميه انو لما يكون يتمنى شي ومايصير فهالشي بأمر الله , وماصرفنا عنه الا لان هالشي فيه الخيره لنا ,
لان ربي هو ارحم بعباده واعلم وين الخيره فيه .
- ابعدي عن اسلوب السيطره خصوصا بالسنوات الاولى من عمر الطفل , يعني حسسيه دائما انو القرار
قراره واعطيه الحريه , ولاتفرضين عليه اكله وشربه ولبسه وحاولي تعلمينه الافضل له , وتحسسينه بطريقتك انو هو اللي يقرر ويختار بدون سيطره منك .
- علمي الطفل عالقناعه يعني مو كل ماطلب شي تجيبونه له ! خليه يستوعب انو فيه اشياء بحدود
امكانيات العائله لو طلبها بتجيه , لكن شي فوق امكانيات هالعائله مفروض مايصر على انو يجيه , يعني
بعضهم كل ماقال طفلهم ابي زي فلان يقولون حاظر حتى لو هالفلان من عائله مقتدره ماديا وهم لا ,
بحجة انو مانبيه يحس بالنقص ! يعني الافضل من الاول علموه عالقناعه , ولا يكبرون هالاطفال بعدين
ويقولون ابي سياره زي ولد فلان ولا ابي شنطه بكم الف زي فلانه , ولو ماعطيتوهم اللي يبون بتجيهم
حاله نفسيه لان من صغرهم مايعرفون القناعه وكل اللي يعرفونه نطلب ويجينا اللي نبيه .
- لما يطلب منك الطفل شي وماتسوينه له , او لما تأمرين بشي ومايسويه , ولجأ وقتها للبكاء , ونفذتي له
طلبه او تنازلتي عن طلبك , راح يتعود بعد كذا على استغلال هالشي , وراح يصير ع كل شي يبكي
علشان يصير اللي يبيه , فنصيحه انتبهي لهالشي من الاول , لاتعطينه بال اذا بكى وخليه يعرف ان بكائه
ماراح يغير شي بالموضوع .
-ابعدي عن اسلوب الصراخ والضرب والهواش لان هالاسلوب بيطيح هيبتك عنده وغير كذا ممكن يأثر
اول مره ومرتين بس بمجرد مايتعود طفلك على اسلوبك ماراح ينفع معه
والحل ؟
استخدمي اسلوب الامر بصوت حاد وجدي مره وحده واذا ماتجاوب معك , كرريه مره ثانيه واذا
مااستجاب كرريه لاخر مره , وبعدها هدديه بانو راح تحطين علامه عند اسمه بجدول السلوك الخطأ (بحكي
عنه بالاخير)
واذا حطيتي له علامه وباقي يعاندك احقريه وامشي ولا تحكين معه لما يعتذر ويصلح خطأه .
- فيه نوع من الاطفال يحب يرفع ضغط اللي عنده , بانو يتعمد يغلط من باب لفت الانتباه له , فهالنوع
لاتعطينه اهتمام وقتها وطنشيه ولا كأن عندك أحد , بس بنفس الوقت حطي في بالك انو لازم تنتبهين
لهالشي وتزيدين اهتمامك فيه بعد هالموقف , لان تصرفه له معنيين
اما اشاره لك بأني ياماما محتاج اهتمام اكثر او عندي طاقه زايده مو عارف اطلعها , اتذكر من زمااان
قالت لي وحده تدرس رياض اطفال, انو الطفل لازم يطلع طاقته او قهره بشي , وافضل حل تعطينه
صلصال او اوراق او أي عمل يخليه يحرك اطرافه .
- فهميه انو اسرار البيت مفروض ماتطلع للناس , وانو اللي يبوح بسر عائلي للناس راح يتعرض للعقاب .
- فيه بعض الاهالي اذا صدر من الطفل شي حلو مايثنون عليه ولا يكافئونه , مثل اذا حب الولد يفاجئ
ابوه وراح مع امه السوبرماركت ولما رجع قال بابا اليوم انا اللي اشتريت اغراض البيت , يعني الطفل
قصده شفني رجال خدمة اهلي
ويرد عليه الاب: الحين انت مستانس يافلان ! ترى كل العيال كذا وش سويت يعني !
او لما البنت تجي تقول ماما سويت كذا وترد عليها عادي كل البنات يسوون كذا لامهاتهم !!
هالاسلوب اكثر اسلوب يمنع الاطفال عن التطور للافضل , يعني وش يضرك اذا قلتي شاطره بنتي اللي تبي
تساعد امها ولاني راضيه عليك بجيب لك هديه !!
- عوديه انو الاخذ مفروض يقابله عطاء , يعني اذا بياخذ من الناس لازم يعطيهم على قد اخذه , وهالشي
من باب رد المعروف والاحسان للغير بالمثل , لكن فهميه انو اذا هو اعطى مفروض يعطي بصدق, وينسى هالعطاء ومايحتري الرد .
- انتبهي لأكل الطفل واحرصي على شربه للماء بكميات كبيره , وعلى اكله للفواكه والخضار والعسل ,
وشرب الحليب , واكله للبيض , وانتبهي اذا عنده حساسيه من صنف معين من الاكل
واهم شي علميه انو مايأكل شي مابعد انغسل , ووضحي له فوائد الاكل الصحي
وضرر الاكل الغير صحي , يعني اذا جلس يأكل فاكهه قولي تدري انو هالفاكهه فيها فيتامين كذا وكذا
خليه يتثقف ويعرف فوائد الاكل علشان يحبها , وحددي وقت للوجبات , وانتبهي عليه من الاكل الزايد
والسمنه , واذا لاحظتي ان حركته قليله حددي وقت للعب ويكون يومي واقصد اللعب اللي فيه ركض وحركه .
- احرصي على نظافته وصحته , يعني عوديه على انو يكون دايما نظيف , لان اذا تعود عالنظافه يصير
خلاص مايتحمل الوسخ ابد , فهميهم انو النظافه مهمه سواء للبنت او الولد , ومو محصوره عالبنات
وبس , يعني حتى الولد مفروض يهتم بريحته ونظافته , ويرتب اظافره ويتعطر, ولاحظي صحته
اذا عنده مثلا صوت بصدره يمكن يكون عنده حساسيه او ربو , واذا حسيتي ان الطفل صاير اليوم فيه
خمول على طول شوفي حرارته واسأليه اذا يحس بألم بجسمه , وراقبي استجابته للنداء يعني اذا جلستي
تنادينه كذا مره وماسمع , شوفي يمكن عنده مشاكل بالاذن , يعني فيه اشياء كثيره لازم ننتبه لها بدري
وكل شي راح تلاحظينه اذا كنتي مهتمه بالطفل , يعني لاحظي اظافره ,عيونه , جلده اذا فيه حبوب او
تبقع وغيرهم .

-فيه بعض العوائل اذا صدر من الطفل تصرف غير لائق قدامهم , يجلسون يضحكون ويعلقون عليه , واذا
عاد نفس التصرف قدام الناس يعاقبونه !
وهالشي اكبر خطأ
وغير كذا بعضهم الام تمنعه من شي والاب يشجعه عليه ! يعني اللي مثل كذا اجلسي
مع زوجك ويا تقنعينه او هو يقنعك , اما انكم تتركون الطفل كذا بين صلح كذا ولا تصلح كذا ماينفع ابد .
- وفيه شي مهم وهو ان بعض المتزوجين يتمادون بالحكي او الحركات قدام الطفل بحجة انو مايفهم !!
الطفل اي شي يسمعه او يشوفه يثبت في باله وماينساه ويأثر فيه , يعني ضروري ننتبه لهالنقطه
واصلا لو تلاحظون فيه اطفال كثير يحرجون اهلهم خصوصا عند الجد والجده
او الضيوف اللي يزورونهم .
- وفيه شيء مهم ومهم مررره بعد (فهمي الطفل انو فيه مناطق بجسمه ممنوع احد يشوفها او يلمسها )
ونبهيه لو احد حاول يكشف جسمه او يلمسه يعلمك على طول ومايخاف لانو ماراح تعاقبينه , واذا
كانوا كبار شوي فهميهم كيف يتصرفون لو احد اعتدى عليهم او حاول يخطفهم , اذكري لهم كذا حيله
للهرب من الموقف , اهم شي تكون مناسبه لعمر الطفل وشخصيته وقبل كل شي وزنه !
يعني صعب تقولين لطفل سمين اول خطوه مفروض تسويها انك تهرب ! لان ماراح يمديه يركض بسرعه
تساعده عالهرب , ولا تقولين لطفل نحيف اول خطوه اضربه من منطقه معينه بجسمه ! لان وزنه مايساعده يضرب, وضروري بعد تعلمينهم رقم الشرطه
والاسعاف والدفاع المدني , وتفهمينهم كيف
يتصرفون مثلا بحالة الحريق او مثلا اذا احد اكل شي قدامهم وماقدر يبلعه واختنق منه .
- وفيه نقطه مهمه وهي اللي يتشارك بتربية هالطفل كذا شخص , مثلي انا , امي عانت معاناه بتربيتي
لاني اكبر حفيده بالعائله , والكل يبي ياخذني عنده ,وفرحانين فيني ولا احد يزعلها ولا احد يبكيها
ولا احد يصرخ بوجهها ! فكانت تعاني تقول ياويلي لو سمع احد صوتك تبكين , هذاك اليوم محد يكلمني
كأني مسويه جريمه , وتقول كنتي من يد واحد للثاني , يعني مافيه مجال اني اربيك على كيفي , لكن
الحمد لله ان هالشي كان بصالحي لان تعلمت من الكل اشياء حلوه , لكن لو كان فيه طفل مثلي قبل , و
كانوا هالناس اللي يتشاركون بتربيته ناس يصدر منهم تصرفات مو حلوه وش مصيره ؟
يعني بجد فيه اطفال يتعلمون اشياء مو حلوه من الجد او الجده , او اذا كانت بنت وعندها عم او خال
يعلمونها حركاتهم وطريقة كلامهم , يعني تكبر وهي تتصرف مثل خالها او عمها وتحكي مثل اسلوبهم ,
ويمكن تكون هالاشياء بحسن نيه منهم لكن هالاشياء تأثر بالطفل اذا ماكانت الام منتبهه , يعني اذا شفتي
ان الناس اللي يشاركونك تربية طفلك كذا , حاولي قد ماتقدرين تكونين موجوده وهو معهم , وتقللين
فترة وجوده عندهم علشان تضمنين انو يكون اغلب وقته مشغول عندك بلعبه او على افلام كرتون او
يلعب مع اخوانه .
- علمي الطفل انو يكون مؤدب اذا كان فيه ضيوف او كنت بضيافة احد , وفهميه انو لو صدرت منه
أي فوضى راح يتعرض للعقاب , لان بعضهم من تدخل وولدها يحوس بيت الناس ,وتلاقينها تصارخ عليه
وتطارده وتضربه وهو مو معبرها, لانها بالاصل معودته على هالاسلوب منها علشان كذا تعود عليه ,
وصار يشوف ان هالشي طبع فيها مو عقاب !
ولا النوع الثاني اللي يحوس ولدها بيت الناس وهي جالسه تضحك وتسولف وماهمها !
اتذكر مره جتنا وحده كذا من دخلت وبنتها تحوس ومابقت شي بالصاله الا حاسته , وانا مالاحظتها الا
لما صرخ اخوي الصغير بجنبي وقال اجلسي عيب الحين ماما تحط لك x وماتعطيك هديه !
انا وقتها لاشعوريا مسكته وضميته من الفرحه , وماقصدت الموقف , بس فرحت لانو شفت تأثير جدول
السلوك الحسن اللي صار لي سنوات اطبقه على اخواني , واتذكر انو الضيفه اللي عندنا انحرجت وقامت
اخذت بنتها عندها , يعني موقف لاتحسد عليه الصراحه طفل يعلمها

رد مع اقتباس
قديم منذ /09-16-2012   #2 (permalink)

غيوم
عُضوٌ بقَرآطُيسٌهَ
 
الصورة الرمزية غيوم

عُضويتيّ 2206
مُشآركاتيَ 36,335
تـَمَ شٌـكٌريَ 5
شكَرتَ 0
حلاُليٍ 0






غيوم غير متواجد حالياً
افتراضي رد: نصائح في تربية الاطفال


معلومات مفيدة يعطيك ألف عاافيه ..

موضوع قيم لا تحرمنا جديدك المميز..

دمت بود

تحياتي لشخصك الكريم..







 توقيع : غيوم


آآنآآ الحلآ وُ آلنآآس حوًلـــي ولآ شي
مثْلٍ الجآآلكَسـٍـي بيـــن توِفي وغندور ً
  رد مع اقتباس
قديم منذ /09-16-2012   #3 (permalink)

ميرال
عُضوٌ بقَرآطُيسٌهَ
 
الصورة الرمزية ميرال

عُضويتيّ 3474
مُشآركاتيَ 2,237
تـَمَ شٌـكٌريَ 0
شكَرتَ 0
حلاُليٍ 0






ميرال غير متواجد حالياً
افتراضي رد: نصائح في تربية الاطفال


شكرا لك ولحضورك الكريم

ودي







  رد مع اقتباس
قديم منذ /09-16-2012   #4 (permalink)

أتعبني غلاك
عُضوٌ بقَرآطُيسٌهَ
 
الصورة الرمزية أتعبني غلاك

عُضويتيّ 2183
مُشآركاتيَ 36,568
تـَمَ شٌـكٌريَ 3
شكَرتَ 0
حلاُليٍ 0






أتعبني غلاك غير متواجد حالياً
افتراضي رد: نصائح في تربية الاطفال


بورك بعطائك
لا عدمنا جمالك ونشاطك
لك التقدير والشكر
ننتظر جديدك







 توقيع : أتعبني غلاك



  رد مع اقتباس
قديم منذ /09-17-2012   #5 (permalink)

ميرال
عُضوٌ بقَرآطُيسٌهَ
 
الصورة الرمزية ميرال

عُضويتيّ 3474
مُشآركاتيَ 2,237
تـَمَ شٌـكٌريَ 0
شكَرتَ 0
حلاُليٍ 0






ميرال غير متواجد حالياً
افتراضي رد: نصائح في تربية الاطفال


شكرا لك ولحضورك الكريم

اسعدتني اطلالتك العطرة

ودي







  رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

الانتقال السريع


الساعة الآن 01:22 AM


Powered by vBulletin® Version 3.8.8 .Copyright ©2000 - 2016, Jelsoft Enterprises Ltd
^-^ جميع آلمشآركآت آلمكتوبهـ تعبّر عن وجهة نظر صآحبهآ ,, ولا تعبّر بأي شكلـ من آلأشكآل عن وجهة نظر إدآرة آلمنتدى ~
site_map RSS RSS2 urllist ROR J-S PHP HTML XML Sitemap info tags

Relax : Relax V. 1.0 © 2012